(2006)
Soroek eta zuhaiztiek, ibaiak eta muinoek sortutako irudi hau
niretzako soilik existitzen ote da,
une honetan bakarrik…
zure etorrerak,
atzoko hodeien iluntasunak bide eman dio argiari,
atzoko soro eta zuhaiztietan, ibai eta muinoetan
ez nuen
zure presentzia sentitu,
gaur berriz, une honetan bakarrik eta niretzako soilik
aldatu egin da dena,
edonorentzat aitzineko betikotasun amaigabea den
izana,
niretzat etengabeko bilakaera aldakorra
erakusten duen ibarraren aurrean nagoelako.
Zama da oroimena,
astuna da gogoratze soila,
amodio gardena lertxun artean igarotzen zela
ondo gorderik dut,
urak dakarren lohia negar malko garbiekin nahasita.
Zabal zabalera hedatuz doa begirada
ekarri didazun une bakan honetan,
iraganaren bila,
oroitzapenen zamak lurraren kontra behartuta,
zapalduta,
soroetako lastoak, ibai ertzeko belarrak bezala
harri lauarekin berdinduz.
Atzo bertan begiek harrapatzen zuten eremua
eraldatu da,
gau honetan opari gisa ekarri duzun argi astunak
den dena txikitu duelako.
Amuitz 